shad0w-share

NYI DEWI SANG HYANG SERI
Oleh Moddi Madiana

Nyi Dewi
Pelak Ambu ti kahyangan
Dipale jampe pamake
Ti hiji jadi harti
Saranggeuy mawa geuhgeuy
Diraksukan jarami nyari, disalendang hejo mawa sono
Nyi Dewi sidengdang jadi sawangan
Ngadampal amparan jagat
Sajagat kariksa rasa

Trung kentrung, ngelentrung disaung lisung
Ngudar raksukan sang dewi, nyacas bodas ngaras beas

Nyi Dewi, ulah nangis
Geusan nyorang titis tulis
Sing rido karerab kahaseupan
Khatam dawam, tapa luhureun hawu
Sangkan asak pangeusi awak

Sari anjeun jadi daging
Nu ngaping tulang jeung sumsum
Asih anjeun ngajirim beubeureum getih
Minangka wiwaha pulas kasuka
Komara rasa jadi cahya
Nyaangan lampah ku lengkahna
Deukeut paneuteup jero panenjo
Geusan nanggeuy angkeuhan maneuh

Trung kentrung ngelentrung panyaur nu luhung
laku manggih tungtung
Mangsa wanci jadi ciri nyorang pipir takdir

Laa Ilaha Ilallah Muhammad Rasulullah.

Subang, wanci janari 7 Maret 2009

TUBAGUS DAKKA
Karya Moddi Madiana

Rengse nyindekeun sibungsu Maeswati Asmayawangi lebah Cikundul
Ki Bagus Dakka ngandika ka sang rai, Bagus rangin
mimiti poe ieu,wayahna urang papisah
engkang rek ngenca muru lamping kaler tangkuban parahu
jug geura lumaku katatar wetan priangan
ulah nyabeulah tina kecap jeung uratna bismillah

Di lamping kaler,
ngaruat jagat ngarumat adat
mapatkeun sahadat jeung shalawat
nyorang hakekat ku sare�at
nyusud ajen ma�rifat ku raketna tarekat

Ki Bagus Dakka.
Ngababakan di sarakan anyar
Nyaung-nyaung sisi wahangan
Nandean cai nu ngagenclang ku jolang
Geusan susuci muru pangwarid ku wirid
Leukeun meuseuh angkeuhan
Miceun daweung kuageman
Netepkeun karep kataqwaan
ngajembarkeun sukma sajatining diri ka Illahi

Lampah merenah jadi pataklidan
kahot lain pedah kolot
digjaya teu lantaran pangabisa
sabar jadi ubar, tawakal mangrupa akal
ngaderes karahayuan ka dulur di unggal lembur
ngalarapkeun amanat Kangrama
� Dia mudu geus tarapti kana harti kakasih Illahi ulah deuk nyempad kana lafad
geura gero jerona warro
dina tapak jeung lacak memeh kiamah �

Subang, Tengahna Mulud 1430 H

KISUNDA DIGJAYA
Karya Moddi Madiana

Bejakeun ka srangenge nu meletek saban janari
Kami datang ti handapna handap rek muru luhurna luhur
Seja neang jeritna langit sugan kapulung palung
nu ngagulung ditutung balung
Hey rajana beurang����������..
Kadieukeun panon panenjo,kadieukeun leungeun paneunggeul
Geura sampakeun pakarang perang
Kami rek balitungan maragat nyawa sang dajal
Sina ngababatang lir babadak
Teundeun kasieun singlar kamelang
Nguyup patidiri seja matri kawani
Demit berewit geura nyingkah ��������
Ngaing rek miang muru tungtung deuleu
Tong boro ukur dicangcang raga
Najan dicacag diwalang-walang kami moal rek hariwang
Sabab kami boga keneh rasa anu salawasna bakal ngajomantara
Geura papag mangsana Kisunda digjaya
Mun geus kapurak ucap boa
Ngaing bakal mulang bareng jeung datangna beurang

Hotel Marbella Anyer Banten 27 Juli 2010 dina lolongkrang Kongres Paguyuban Pasundan ka 41

NAHA, CENAH
Moddi Madiana

Cenah Walanda nu ngaranjah lemah kungsi diusir
Cenah Jepang nu ngarogahala kungsi diala jiwana
Cenah Inggris nu ngajejewet nagara kungsi disasaak
Cenah kominis nu ngotoran sarakan kungsi diperenan

Naha atuh kiwari,
Nu ngaranjah beuki rongkah
Nu ngarogahala beuki tohaga
Nu ngajejewet beuki awet
Nu ngotoran beuki sohor

Sanggeus urang Merdeka. !
Moddi Madiana
Subang, 17 Agustus 2011 Jam. 01.15 bada renungan suci

OPAT TAUN
Oleh Ustadz Awa Motivator Cinta (Ustadz AMC)

Opat taun ngantunkeun salira
opat taun ngabantun kacinta
tos nyaba ka sagala arah
teu janten duriat mengkol
tetep nyangreud

Opat lebaran kaasih dina manah
opat lebaran kanyaah teu liren
sanaos seueur gogoda
tetep kadeudeuh teu ngalih

Opat taun tos kalangkung
kiwari abdi mulih ka lembur
ngabantun katulusan asih

Nyanggakeun cinta ti abdi
mung pikeun salira
sapertos kapungkur
tetep gembleng
salamina�

Puisi ini karya : Ustadz Awa Motivator Cinta (Ustadz AMC),
penulis buku MOTIVASI CINTA�